اللى شايف ان كلمة عانس عيب احب اقولك انت غبى و متخلف مفيش حاجة اسمها
عانس فيه حاجة اسمها انا مش عايزة اكون كربونة لحياة على ورق و تكرار لمأساة اللى
قبلى انا بنت و عندى 22 سنة و مش هقبل انى اتجوز لمجرد انى احصل على لقب زوجة و
مدام فلان انا مش مدام حد انا امل و بس و لا زعلانة من كلمة عانس انا عاجبنى كده
عانس دى الكلمة اللى اخترعتوها انتو عشان تحاولو تشوفونى ناقصة و عندى نقص الجواز
مش شبكة و مهر و بيت و اولاد و مدام و دبلة و فرح و اوكا و اورتيجا الجواز اكبر من كده بكتير .تعالو
نشوف الناس شايفة الجواز ازاى و انا شايفاه ازاى
الولد عايز بنت مغمضة ( معرفش يعنى ايه مغمضة دى دا عيب مش ميزة يا جاهل )
و تكون بتتطبخ زى مامته و كأن الجواز عبارة عن اكل و بس و تعرف تكوى و تنضف و
كأنها شغالة ( مع الاعتذار للشغالات انتو فوق راسى ) و تربى العيال ( و كأنها دادة
) مشفتش ولد فكر انه عايز واحدة بتفكير فلانى او بتقرا لعلان او بتحب الاتجاه
الفلانى
البنت عايزة ولد امور و يكون ظابط او وكيل نيابة ( معرفش ليه مع ان دمهم
يلطش ) او مهندس او دكتور ( متعرفش انهم بيشحتو اخر النهار ) و لازم يكون شبه مهند
و رتبة كويسة و حاجة برستيج و ممكن تتنازل عن الجمال و عن اى حاجة بس المهم تتجوز
يا عم عشان متحصلش على بادج عانس و تتنك على صحابها و تغيظهم بالدبلة مشفتش بنت
بتقول اناعايزة ولد مثقف او بيقرا او ليه طموح و عنده رؤية مشفتش بنت بتقول انا
عايزة ولد متفاهم عشان نبنى مستقبلنا سوا
الاب و الام عايزين لبنتهم عريس مريش وافى الشروط من غير غلطة و لما يجى
العريس سييل الطلبات يشتغل شقة و عفش مش عارف منين و البيت 5 اوض مع ان البنت و
الولد مش محتاجين غير اوضتين و صالة ليهم و لبنتهم او ابنهم اللى هيخلفوه متعرفش
الباقى دا ليه و النيش و طقم الجيلى دا الجوازة ممكن تقف عشان طقم الجيلى
اما اهل الولد عايزين عروسة يكون السى فى بتاعها ابيض بدون عيوب او شوائب و
معملتش غلطة فى حياتها و كأنها مش بشرو لازم تبقى جميلة و بيضة ( وكأن السمر كخة
ملحوظة انا بيضة و مع ذلك بشوف نفسى مش حلوة )
و تكون متعرفش الالف من كوز الدرة عشان
متتطلعش مفتحة و دى قلة ادب فى حد ذاتها ( معرفش ازاى يعنى اومال هتربى ولادها
ازاى يا جدع طول ما هى قطة مغمضة و متعرفش الالف من كوز الدرة طب هتفتح بيت ازاى ؟
)
نيجى بقى للفرح يا سلاااااااام اموت و اعرف لزمة اللى جابوه اييييييه ؟
اللى اخترع الفرح دا كان بيفكر فى ايييييييييييييه ؟ الفرحة مش بالكهربا اللى تعمى
العين و الدى الجى اللى يفقع الودان و لا باوكا و اورتيجا و النمر و الرقاصة ام
بطن .مالو ريسبشن لذيذ بسيط يضم العيلة و الصحاب و شكرا كدا و برضه هنفرح و نلبس
فستان و بدلة طب هيا الفرحة بالكلام دا و لا الفرحة هوا انك لقيت حلم حياتك و شريك
اللى بتتمناه فاهمك و هتعرف تكمل معاه ؟
انا شايفة ان العيب مش المجتمع العيب فينا احنا عشان ماشيين ورا الكلام دا
لحد امتى نقول دا اللى ماشى و المجتمع ياكل وشى ؟ و كلام الناس ؟ و بنت عمى جابت و
ابن عمى اتجوز و انا لسه جمب امى ؟ الجواز مش صفقة الجواز مش لعبة اتقو الله
الجواز اكبر من كده دا شئ مقدس يا جدعان انت بتبنى مجتمع كامل و امة كاملة لازم
قبل ما تقدم على الخطوة دى تكون مؤهل ليها و فاهمها صح و تفكر فيها صح عشان تربى ولاد يطلعو بالبلد مش ينزلو
بيها عشان متخلفش عاهات زينا يا جدع مش عارفين يتعايشو حتى مع اى حاجة. عشان تعرف
تكون سعيد عشان تكمل حياتك مع حد فاهمك مش بيأكلك و يغسل لبسك و يربى ولادك الجواز
مش دبلة و اكلة و نومة و سرير الجواز تفاهم نقاش حياة كاملة بيتقاسمها شخصين سوا
بيتشاركها اتنين شركة و بيبنوها سوا يااما الاساس يطلع قوى و مفيش اى عاصفة تهز
الكيان دا يا اما الاساس يبقى مسوس و تيجى اول نسمة هوا تهده راعو ربنا و فكرو
شوية قبل ما تاخدو قرار و ارتبطو باللى يناسبكم عقليا مش شكليا و بلاش و النبى
احيييييييااااااات ابوكو جو الافراح اللى بيصرف اكتر من تجهيز البيت دا
صدقت في كل كلمة ولكن لكل قاعدة استثناء ، فإن لم تجدي استثناء هذه القاعدة ، فافتخري فعلا أنك عانس لم تتورطي بعلاقة زوجية تنمحي فيها إنسانيتك وخصوصيتك لتصبحي طباخة للبيه ودادا لأولاده منك .. نحن بحاجة إلى مجتمع آخر جديد يعرف ما معنى كلمة الحق قبل أن يسأل أين الواجب
ردحذفاشكرك يا فندم جدا جدا
ردحذفعجبني الكلام، للاسف حال البنات بيصعب عليا لما الاقيهم بيدوروا على حد يتجوزوه و خلاص، لان ده في حد ذاته اهانة ليهم ، و اهانة غير ضرورية لان كدا كدا هيتجوزوا في الاخر .
ردحذفللاسف الشعب ناقصه حاجات كتير، اللي بتقوليه ده موجود عند المجتمعات المتحضره مش عند شعب امي !
اتمنى ان نصل يوماً لتلك العقلية .
عندى امل اننا نوصل يوما ما :)
حذفوَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآيَاتٍ لِقَوْمٍ يَتَفَكَّرُونَ خير ما ابد به كلامى هذه الاية الكريمة التى يخاطب الله فيها قوم يتفكرون ان الله خاطب العقل ونحن نعيش فى مجتمع أسفٌ أن يكون رجعيا كل ما يشغله فى الحياة الزوجية فى الاسرة التى تنشا فى مجتمع الغد هو شبكة ومهر وشقه ومعرفش وبحد تعبيرنا نحن نطلق على المهر اسمٌ مستفز اسمه العلبة( هههههههه) وننسى او نتناس ان حياة المشاركة فى التفكير فى التربية فى الاحلام فى كل شئ حتى فراش النوم فيجب أن تبنى على أساس سليم والعيب فينا معشر الشباب فلابد أن نرسم مستقبلنا كما نريده نحن بكفاحنا ومشاركتنا لا كما يريده الاهل فاننى اعلم بكثير من النماذج المشرفه التى تحدت العادات والتقاليد بل والاهل وعاشو كما ارادو وهم اليوم من اسعد ما يكون ويسعون لتحقيق احلامهم باذن الله .المهم الموضوع جميل ورائع بس انا مش هسنى على الكاتبة لآنى لو وصفتها بما يدور بخاطرى أخشى عليها الغرور ربنا يوفقك وتنتصر على العادات الخاطئه .ننتظر المزيد
ردحذفكلامك مظبوط جداً, وتفكير جميل
ردحذفمتشكرة جدا يا فندم :)
حذف