عانس و افتخر

اللى شايف ان كلمة عانس عيب احب اقولك انت غبى و متخلف مفيش حاجة اسمها عانس فيه حاجة اسمها انا مش عايزة اكون كربونة لحياة على ورق و تكرار لمأساة اللى قبلى انا بنت و عندى 22 سنة و مش هقبل انى اتجوز لمجرد انى احصل على لقب زوجة و مدام فلان انا مش مدام حد انا امل و بس و لا زعلانة من كلمة عانس انا عاجبنى كده عانس دى الكلمة اللى اخترعتوها انتو عشان تحاولو تشوفونى ناقصة و عندى نقص الجواز مش شبكة و مهر و بيت و اولاد و مدام و دبلة و فرح و اوكا  و اورتيجا الجواز اكبر من كده بكتير .تعالو نشوف الناس شايفة الجواز ازاى و انا شايفاه ازاى

الولد عايز بنت مغمضة ( معرفش يعنى ايه مغمضة دى دا عيب مش ميزة يا جاهل ) و تكون بتتطبخ زى مامته و كأن الجواز عبارة عن اكل و بس و تعرف تكوى و تنضف و كأنها شغالة ( مع الاعتذار للشغالات انتو فوق راسى ) و تربى العيال ( و كأنها دادة ) مشفتش ولد فكر انه عايز واحدة بتفكير فلانى او بتقرا لعلان او بتحب الاتجاه الفلانى

البنت عايزة ولد امور و يكون ظابط او وكيل نيابة ( معرفش ليه مع ان دمهم يلطش ) او مهندس او دكتور ( متعرفش انهم بيشحتو اخر النهار ) و لازم يكون شبه مهند و رتبة كويسة و حاجة برستيج و ممكن تتنازل عن الجمال و عن اى حاجة بس المهم تتجوز يا عم عشان متحصلش على بادج عانس و تتنك على صحابها و تغيظهم بالدبلة مشفتش بنت بتقول اناعايزة ولد مثقف او بيقرا او ليه طموح و عنده رؤية مشفتش بنت بتقول انا عايزة ولد متفاهم  عشان نبنى مستقبلنا سوا

الاب و الام عايزين لبنتهم عريس مريش وافى الشروط من غير غلطة و لما يجى العريس سييل الطلبات يشتغل شقة و عفش مش عارف منين و البيت 5 اوض مع ان البنت و الولد مش محتاجين غير اوضتين و صالة ليهم و لبنتهم او ابنهم اللى هيخلفوه متعرفش الباقى دا ليه و النيش و طقم الجيلى دا الجوازة ممكن تقف عشان طقم الجيلى

اما اهل الولد عايزين عروسة يكون السى فى بتاعها ابيض بدون عيوب او شوائب و معملتش غلطة فى حياتها و كأنها مش بشرو لازم تبقى جميلة و بيضة ( وكأن السمر كخة ملحوظة انا بيضة و مع ذلك بشوف نفسى مش حلوة )  و تكون متعرفش الالف من كوز  الدرة عشان متتطلعش مفتحة و دى قلة ادب فى حد ذاتها ( معرفش ازاى يعنى اومال هتربى ولادها ازاى يا جدع طول ما هى قطة مغمضة و متعرفش الالف من كوز الدرة طب هتفتح بيت ازاى ؟ )

نيجى بقى للفرح يا سلاااااااام اموت و اعرف لزمة اللى جابوه اييييييه ؟ اللى اخترع الفرح دا كان بيفكر فى ايييييييييييييه ؟ الفرحة مش بالكهربا اللى تعمى العين و الدى الجى اللى يفقع الودان و لا باوكا و اورتيجا و النمر و الرقاصة ام بطن .مالو ريسبشن لذيذ بسيط يضم العيلة و الصحاب و شكرا كدا و برضه هنفرح و نلبس فستان و بدلة طب هيا الفرحة بالكلام دا و لا الفرحة هوا انك لقيت حلم حياتك و شريك اللى بتتمناه فاهمك و هتعرف تكمل معاه ؟

انا شايفة ان العيب مش المجتمع العيب فينا احنا عشان ماشيين ورا الكلام دا لحد امتى نقول دا اللى ماشى و المجتمع ياكل وشى ؟ و كلام الناس ؟ و بنت عمى جابت و ابن عمى اتجوز و انا لسه جمب امى ؟ الجواز مش صفقة الجواز مش لعبة اتقو الله الجواز اكبر من كده دا شئ مقدس يا جدعان انت بتبنى مجتمع كامل و امة كاملة لازم قبل ما تقدم على الخطوة دى تكون مؤهل ليها و فاهمها صح و تفكر  فيها صح عشان تربى ولاد يطلعو بالبلد مش ينزلو بيها عشان متخلفش عاهات زينا يا جدع مش عارفين يتعايشو حتى مع اى حاجة. عشان تعرف تكون سعيد عشان تكمل حياتك مع حد فاهمك مش بيأكلك و يغسل لبسك و يربى ولادك الجواز مش دبلة و اكلة و نومة و سرير الجواز تفاهم نقاش حياة كاملة بيتقاسمها شخصين سوا بيتشاركها اتنين شركة و بيبنوها سوا يااما الاساس يطلع قوى و مفيش اى عاصفة تهز الكيان دا يا اما الاساس يبقى مسوس و تيجى اول نسمة هوا تهده راعو ربنا و فكرو شوية قبل ما تاخدو قرار و ارتبطو باللى يناسبكم عقليا مش شكليا و بلاش و النبى احيييييييااااااات ابوكو جو الافراح اللى بيصرف اكتر من تجهيز البيت دا

انا لا اتبع دينكم فارحمونى

جلست اتأمل حال الدين كل دين و ليس فقط دينى . اتأمل الناس الذين يطوعونه على حسب اهواءهم فمنهم من يعلم انه يحرف و منهم من لا يعلم و منهم من لا يعلم و يظل يحرف ظنا منه انه يفعل الصواب و نوع اخر لا يأبى بالموضوع من اساسه .

دعونى اسألكم سؤال ما هو الدين فى وجهة نظرك ؟ اهو غاية ؟ وسيلة ؟ وسيلة لماذا؟ لمصالحك الشخصية ؟ لمصالح الدولة ؟ لمصلحة لا تعلم لمن هى ؟ ام انه وسيلة للوصول لربك ؟

اذا كنت/ى تنظر/ين الى الدين على انه غاية فلا تكملون مقالى و كفى ما قرأتموه اما اذا كان وسيلة فدعونى اوضح شيئا بسيطا لكم . ان الدين ليس غاية و لكنه وسيلة للوصول الى الله فالصلاة و الصوم و غيرها من العبادات طرق مختلفة للوصول الى الله فاذا كنتم ممن يصلون لان هذا فرض عليكم او كنتم تصومون خوفا من العقاب او كنتم تمتنعون عن الخطأ و تحسنون الى الناس من دافع الدين الذى يملى عليك ذلك و ليس كنوع من الايمان الداخلى بان ذلك هو الصواب و هذا ما سيجعلك انسان بحق اذن يجب عليك اعادة النظر مرة اخرى. ان الصلاة طريقة روحانية للتواصل مع الاله فهو اجتماع روحانى يجمعك معه للتواصل سويا . الصوم طريقة تجعلك تشعر بمعاناة الغير و بالتالى ستشعر بواجبك اتجاه هؤلاء . و لكن من منكم ينظر الى تلك العبادات كما قلت سابقا ؟ قلة قليلة جدا ان وجدت هى من تنظر اليها  من ذلك الاتجاه و لكن الغالبية الساحقة ترى غير ذلك و تؤمن تمام العلم بانها على حق و هذا ما يجعلنا فى مأزق لا نحسد عليه .

انى لا ادين بدينكم لا اؤمن بان الصلاة و الصوم مجرد طقوس يجب على تطبيقها كما انزلت دون التركيز على اهميتها ..هدفها و هل قمت بها من اجل التخلص من عقاب عدم القيام بها ام قمت بها من اجل التقرب اكثر الى الله و التعرف عليه عن قرب؟ انا لا اؤمن بكلامكم الذى تبعثوه و تنشروه فى كل مكان و لكنى اؤمن بعقلى الذى خلقه الهى لى كى اتدبر به. لا اؤمن انى ناقصة لمجرد انى انثى و لست ذكرا . لا اؤمن بانى سيئة لمجرد انى لا البس الحجاب و تلك خلوقة لمجرد لباسها الفضفاض . انا اؤمن بالاخلاق . الاخلاق التى تنبع عن اقتناع و ليست الاخلاق التى تنبع عن اوامر لابد من تطبيقها. انا اؤمن بالعقل و ما يوصلنى اليه . اؤمن بروحى التى اخلو بها و ابدأ فى حديث بينى و بينها و بين الاله .

انا لا اؤمن بكم و لا بأوامركم و لا عرفكم و لا تقاليدكم و لا كلامكم و لا افعالكم انا لا اؤمن بدينكم فارحمونى من شعاراتكم الزائفة و كلامكم الذى يدفعنى للجنون . دعونى اصل الى ما ابحث عنه فى صمت و هدوء دعونى اتقرب الى الله الذى لم يعطى الحق لاحد ان يتحدث باسمه دعونى رحمكم الله و رحمنا منكم 

من وسط الحقيقة اتحدث

البداية كانت الساعة 2 بليل لما قررت و طأت فى دماغى (كعادتى المجنونة ) انى اروح اسيوط مكنتش عارفة ليه و لا هعمل ايه بس بعد ما شفت صورحادث قطار اسيوط  و الكلام على التليفزيون و النت قررت اسافر اسيوط يمكن الفوران و الغضب اللى جوايا يهدا شوية. لقيت بالصدفة على غير العادة هيثم صاحبنا من الالتراس على تويتر عامل تويتة بعتله فى ساعتها بقوله تنزل اسيوط ؟ و الرد جالى فى لحظتها ايوا ساعتها اتفقنا ننزل سوا و  قلنا هننزل الصبح بدرى و اتفقنا و حاولت اوصل لكل واحد صاحى او اونلاين ساعتها اقوله محدش وافق لظروفهم الصعبة المهم انا معرفتش انام كويس و الصبح طلعنا على المحطة و بعد انتظار مجاش القطر قررنا نروح مواصلات ( رغم تحذيرات اختى اللى قالتلى ان الطرق مقطوعة و مش امان ) بس فضلت مصممة انا و هيثم اننا نروح و كلمنا صحابنا فى اسيوط عشان نظبط معاهم . شفت فى عين هيثم طول الوقت الخوف من الريسك دا طبعا مخاطرة انه يتحمل مسؤلية  قدام المجتمع اننا ننزل سوا اسيوط فى وقت زى دا . حاولت بكل وسيلة اطمنه انه عادى و انا بسافر كتير فى ظروف زى دى. العربية اللى ركبناها كانت طالعة من القرن الرابع و بتكح و ماشية على 20 لكن قلنا معلش مش مشكلة المهم نوصل و انا قاعدة فى العربية طلعت كتاب اقرا فيه و فى نص الطريق لفت انتباهى حديث دار بين السواق و واحد راكب جمبه انا هنقلكم الحديث اللى دار

الراكب : ايه اخبار الحادثة يا حج ؟

السواق : حادثة ايه يا باشا ؟

الراكب : بتاعت القطر دى اللى حصلت امبارح

السواق : اهى حادثة زى اى حادثة و يومين و تتنسى و ترجع كل حاجة زى ماهيا

الراكب : عندك حق و لا حد هيتعاقب و لا بتاع يادوبك يومين جزا و خلاص

السواق : و الله اللى مزعلنا بس الاطفال

انا سمعت الكلام دا ازبهليت و بحلقت بعيد عنكم بقيت بقول لنفسى الناس من كتر المصايب نحست و احساسها نحس و صدى معدتش تفرق معاهم يا حول الله يارب

لحد كده و قلت ماشى . وصلنا بعد 3 ساعات سفر عدو علينا 3 سنين و كان قدامنا ساعتين كمان ونوصل القاهرة و المصحف لو بعربية عدلة المهم اخدنا تاكسى وقررنا نروح المستشفى للمصابين قبل منطلع على القرية لاهالى الشهداء

اول ماوصلنا المستشفى و حاولنا ندخل قالو ممنوع و لحسن حظنا كان داخل بعدها مسؤول الصحة فى مجلس الشورى دخلنا وسط الزحمة معاه ( اه طبعا مصورين و صحفيين بيغطو الخبر ) نسيت اقولكم ان سواق التاكسى كان فاكرنى صحفية من كلامى معاه او دكتورة و جاية عشان الحادثة قلتله انا لا دا و لا دا قالى و الله فيكى الخير هيتردلك ان شاء الله قلتله متشكرة و فضلت اتطلم معاه السواق كان سنه مش كبير و لا صغير بس فضل يشكيلى من العيشة قبل و بعد الثورة و كلام كتير اكيد انتو عارفينه مش هعيده قلتله ربنا يصلح الحال

نرجع للمستشفى بعد ما دخلنا مع السيد المسؤول المبجل لقينا الباشا راح اتصورلو صورتين جمب المصابين و كام واحد معاه كده و بعده دخل حزب النور (طبعا هتسألونى عرفتى ازاى ؟ هقولكم العهر السياسى حضرتك حاطين دبابيس عليها شعار الحزب عشان تعرفو بس ان الناس دى بتستغل الموقف عشان الكرسى ولاد وسخة كعادتهم مش هيجبوه من بره ) و انا واقفة مع هيثم و رشاد و ناس تانى و من جوايا نااااااااااار بغلى

المهم واحد معانا من اسيوط قال ان المستشفى استغلت الحادثة عشان تسد عجز الادوية اللى عندها الحاجات اللى جتلها اكتر من اللى محتاجينه و اخدته برضه و بتاخد لسه . انا طبعا بسمع و مشلولة لكم ان تتخيلو

بعدها مشى كل المسؤولين و لقينا الامن بيشخط لازم يخرج كل الناس !!! طبعا لازم ماهو المسؤولين مشيو خلاص احنا فضلنا طلعنا شوية و رجعنا من الباب اللى ورا و دخلنا نطمن على المصابين اول واحد شفته و الوحيد اللى شفته بجد من قريب كان طفل صغير جسمه مفيهموش حتة سليمة و باباه و مامته ماسكين قطن بيحموه L لكم ان تتخيلو الموقف انا انهرت و خرجت و باباه فضل يصرخ حراااام عليكم سيبونا فى حالنا ابننا بيموت كان فاكر اننا صحفيين او مسؤلين L

المهم خرجنا و انا فضلت ابص على المستشفى حاجة لا توصف فى كلمات حالات متلقحة فى كل صوب و حدب هنا و هنا ممكن انت و ماشى تخبط فى حالة مرمية على الارض عادى و حالات بسريرها بره فى الطرقة و ناس ماسكينها اتنين شكلهم مش لاقيين ليها سرير اصلا و حاجات توجع قلبك لو كتبت لبكرة مش هخلص و اصوات عالية و صريخ و عويل و دكاترة مش عارفة تعمل ايه ياعينى و مرضى مش مستحملين الالم و لا لاقيين رعاية و لا حتى سرير او اوضه تلمهم و اهالى مرمية على الارض بتشوف زويهم و هما بيموتو بالبطئ عشان الدولة مش معبراهم و لا حاسة بيهم و شباب جاى يغطى كل دا من حزب الدستور او المجلات و الجرايد

وقفت اتفرج على المهزلة و عينى كش قادرة تسكت عن الدموع بقى دا حالنا و حال الشعب ؟ دا حالك يا مصر ؟ ناس مرمية مش لاقية رعايو صحية و ناس تانى لو صباعها اتهرس تطلع بره مصر على حساب الدولة تتعالج و لا تعليق

دا غير منظر المستشفى و الصوت العالى اللى يخلى اى حد يدخل على رجله يطلع على نقالة و حالة الشعب اللى تصعب على الكافر حتى اللى جايين مع المصابين و الحالات المختلفة اشكالهم باين عليها البؤس و العيشة اللى على ورق لكن هما ميتين بالحيا

الحقيقة و الواقع اصعب بكتير و ابشع من الصور على الفيس .سبنا المستشفى و خرجنا لقيت الناس عايشة حياتها عادى جدا استغربت سألت صاحبنا هيا اسيوط مفيهاش اى حاجة ؟ قالى و لا حاجة دا حتى النهاردة فاضية و هادية و لا اى رد فعل حصل و الناس مكملة حياتها عادى

حاولت اشوف طريقة نروح بيها للقرية اللى فيها الاهالى بس حسبناها لقينا اننا اتأخرنا جدا عشان كده اتفقت انا و هيثم انى اروح و هوا يكمل الرحلة لوحده و انا وراجعة طلع عينى لا قدرت ارجع قطر و لا سوبر جيت قررت ارجع مواصلات و خلال رحلة الرجوع سمعت جملة اتقفل عليها اليوم قفلة و لا نهاية فيلم a walk to remember  لقيت واحد بيقول للتانى حاجزين فى القطر لينا اسبوع يا راجل و السن مراته تكمل و تقول مستنتش الحادثة تحصل بكرة و لا بعده لما نرجع ؟! انا سمعت الجملة و اتصدمت و سكت مقدرتش اتكلم لحد مشفت رنة الموبايل من صحابى بيطمنو عليا و لحد دلوقتى بحاول استوعب كل اللى شفته النهاردة مش قادرة اطلع من دماغى مشهد الطفل و باباه اللى فى المستشفى و لا قادرة اخلص من جملة حادثة عادية و تعدى , مستنتش الحادثة يومين كمان ؟ L انا معنديش تعليق على اللى بسمعه بس انا كنت فاكرة ان سفرى اسيوط هيريحنى و يهدى الغضب و الهوجة اللى جوايا لقيت الحقيقة العكس تماما انا غضبى و حزنى زاد و مش عارفة اقول ايه انا فعلا مش لاقية حاجة تتقال غير " لا تعليق " و لا عزاء للانسانية 

يوم من ايامى على الارض

استقيظت كعادتى فى ساعة لا ادرى اذا كانت متأخرة ام لا لكن جل ما اعلمه اننى اكتشفت ان الصداع قد تزوج بعقد غير شرعى برأسى تاركا لى آلامه المبرحة كنتيجة لا استطيع الهروب منها .كالعار الذى يلازم فتاة شرقية فى الثامنة عشر من عمرها القت بنفسها فى احضان شهوة لتصحو و لا تجد سوى الالم ملازما لها

الجنون الهلاوس الكوابيس الاحلام الرؤى تلاحقنا اينما ذهبنا . شئ يدعو للشفقة . اشفق على حالى و حال الانسانية . الانسانية  تلك الفتاة التى لم تغادر الرابعة من عمرها بعد بشعرها المجدل الناعم و عيناها البراقاتان التواقاتان الى السعادة و السلام و قلبها النقى الابيض الذى لم يتذوق مرارة الغدر بعد فتم قتلها بابشع الطرق لتصبح اسطورة يتداولها البشر سويا دون معرفة ما اذا كانت حقيقة ام مجرد حكاية قبل النوم لكى نستطيع الصمود.

لقد فقدنا قدرتنا على الحلم و ضعف بصرنا و لم نعد نبصر سوى السواد حتى السواد لم يعد يعنى شئ لنا سوى امر واحد. كل شئ فى عالمنا اصبح له وجه واحد الا و هو القبح .

القبح ذلك المتشرد الذى وجد ضالته فى الانسان فعاش بداخله و استولى على كل انشطة حياته ليفرد اجنحته فى فضاء الارض التى يسكن بها الانسان

الانسان ذلك المعنى القاموسى الذى تغير بعد مؤامرة ليصبح تعريفه مغاير للحقيقة

الحقيقة تلك الوهم الكبير الذى ضاع و غرق وسط عاصفة فى المحيط ليكتشفها من يذهب و لا يعود مرة اخرى ليخبرنا بها

قد اكون الشخص الخاطئ فى المكان الخاطئ افعل الخطأ عن عمد و لكنه لم ينبع منى بل من ذلك الذى خلق الخطأ و ذرعه بداخلى

اردت معرفة الحقيقة الواقع جربت الخيال وجدته محال رجعت للواقع فلم اجده فتهت وسط هذا و ذاك و لا ادرى الى اين المآل اكتب هذه الكلمات و لا ادرى من اين جاءت و الى اين تذهب لكننى على يقين باننى يوما ما سأذهب فى رحلة الى وسط المحيط لاجد الحقيقة بانتظارى لكننى وقتها لن استطيع ان اعود اليكم لاخبركم سأنتظركم مع الباقيين لنرى ما سنؤول اليه سويا و الى ان اصل اريد منكم الانصات الى صوت الضمير الذى اصبح اخرس فى عالم اعمى 

عيون محمد محمود

اعتذر عن الصورة و لكن هذه هى الحقيقة المؤلمة التى نغمض العين عنها 

عيون محمد محمود لسه سهرانة منامتش عيون بتبكى عيون بتدمع و عيون غاب النور عنها عشان نور الحرية يغطى على ضى العين . لسه فاكرة كل لحظة و كل مشهد . و فى اول ذكرى لمحمد محمود مش عايزة اقول حاجة . كل حاجة اتقالت . الابطال هما الشهداء . اللى يستاهل راح و اللى فاضل شوية مخلوقات بتتكالب على كرسى و بتسرق حق شهيد و مستكترة عليه اسم بطل مستكترة عليه حقه فى الدنيا و حقه بعد الموت سرقو حياته و سرقو حقه سرقو ضى العين و قالو احنا ابرياء الذنب ذنبهم هما المجرمين هما القلة المندسة هما البلطجية . فعلا هما بلطجية. بلطجية الحرية. مجرمين لانهم طالبين الحق . مجرمين عشان مش عارفين يسكتو مش عارفين يبقو عبيد مش عارفين يمشو تحت الحيط هدو الحيط فوق راسهم عشان تشرق شمس الحرية اللى غابت عنا و لا عرفناها و لا مرة فى حياتنا و لا حياة اجدادنا . ماتو عشان غيرهم يعيش . يعيش بجد مش يبقى عايش على الورق و بس . ناس نامت فى عز البرد على الرصيف . ناس نزلت و هيا عارفة انها مش راجعة و لو رجعت مش هترجع زى ما راحت . ناس مكانتش عارفة بعضها لكن كان بيجمعهم دم واحد دم الحرية دم الحقيقة اللى غايبة عن عنينا و عمرنا ما هنعرف نوصلها طول ما الخوف عارف طريقه لينا . ناس هزمت خوفها و فازت بمعركة الحرية و احنا لسه محبوسين فى سجن الخوف و الخنوع . الى كل بطل من ابطال محمد محمود الى كل شاب و فتاة نزلو عشان خاطر يقولو لأ بأعلى صوت انتو انضف شئ فى الدنيا عشان كده انتو مش موجودين وسطنا و اللى لسه فاضل لسه بيحارب و هيحارب عشان اللى راح و اللى جاى و اللى لسه مؤمنين بيه و مش هنتنازل عنه تحية اجلال و احترام و تكريم لابطال محمد محمود المعروفين منهم و المغمورين  ستظل ذكراكم فى اذهاننا و لن ننساكم